مساء الخير، 

أنا بنت لبنانية زحلاوية / مرشحة مستقلة على لائحة القوات اللبنانية / عن لبنان عن البقاع / وعن زحلة / مش رح احكي شِعر وقول عنّا دار السلام ومربى الأسودي / رح قلكن زحلة لي نسوانا رجال / ورجالا بينحسبلن ألف حساب.

كيف بلشت الخبرية؟

رِبيت بِبيت شرِبت منو روح التحدّي والنضال والوطنية/ علّموني كون قوّية / انو واجه / انو سلاحي هو علمي وثقافتي/ وعلّموني انو بالعِلم والثقافة والمعرفة / وحدُن منقدِر نعمِل تغيير حقيقي / ويلي كان الدافع الأقوى لترشّحي/ هو إنو دخول المرأة على المعترك السياسي/ والحياة العامة/ شكّل قيمة مضافة وعلامة فارقة .

واليوم / من بعد ما صِرت طبيبة أسنان / واشتغلت بهالمجال الانساني / صرت اكتشف واقتنع كل يوم اكتر من يوم / انو عايشة ببلد ما بيشبه مهنتي الإنسانية ، ولا القيم الي تربيت عليا وحاملتا بقلبي .

لكل حدا عم يسأل لاي ترشحت ؟

ترشّحت لأنو لبنان اليوم عم بعاني / مرضو مستعصي/ ويلي موجودين بموقع القرار والمسؤولية / مع الأسف بيملكو كل شي / الّا روح الوطنية والانسانية.

لبنان عم بعاني/ صحيح / موجوع كتير/ بس الدوا موجود / دواه حكيم شاطر/ وانسان قبل كل شي/ وبِحِب لبنان اكتر من اي شي .

لبنان عم بعاني/ لبنان موجوع / وانا دِقِت هيدا الوجع لانو عشت تجربة شخصية مُرّة / نتيجة الإهمال والوضع المتردّي بلبنان. كنت محكومة اعدام / وكلن شالو ايدن وبقدرة الاهية وبفضل ارادتي الصَّلبة / رجعت للحياة / وزاد تصميمي على مساعدة الناس بشتّى الطُرق من خلال خوض العمل السياسي / حتى ما حدا يتعرض للتجربة البشعة يلي تعرضتلا .

لاي صار معي هيك ؟ وشو السبب؟

الجواب واحد / لانو ببلدي ما في لا مساءلة ولا محاسبة . المواطن محروم من ادنى حقوقه ورغم كل شي/ بدنا نعيش لانو الحياة بتلبقلن.

نحنا بالبقاع / ما بشيلنا من ازمتنا الاّ الامركزية الادارية / لانو كل منطقة بتعرف مشاكلا الاساسية وبتعرف تلاقي الاساليب لحلا / ولانو الانسان ببلش من بيتو ومن بيئتو /عرفت / انو البداية من زحلة لتوصلني عكل لبنان.

ومن زحلة بدي وجّه رسالة لكل اللبنانيات واللبنانيين / لبنان بخطر .....

- خيرة شبابنا وأهمّ أطبائنا هاجروا / تركوا الوطن من دون ما يطلّعوا وراهن .

- عتّمولنا شوارعنا وقلوبنا / شالوا الدفا من بيوتنا ومدارس ولادنا / حوّلو اجمل بقعة من هالكرة الارضية / من بستان أفراح لساحة قهر وذلّ للشعب .  

- بلاد العالم بكيت على اطفالنا / لأنو انحرموا الحليب من ورا احتكار التجار للمواد الغذائية.

- تاجروا بالدوا و بأرواح العالم وعطونا دوا مزيّف.

- سرقوا جنى عمرنا / عيّشونا الذل على ابواب المصارف ومحطات البنزين والافران. 

والاهم/ وين نحنا من استقلالية القضاء؟

كرمال مين ؟ قبل ما يكون كرمال اي شخص او اي قضية / كرمال نعرف الحقيقة / حقيقة تفجير بيروت/ حقيقة جو / بيتر / الكسندرا / شربل ومحمد /عمر وحسين / سحر وجورج وغيرن كتار...... 

- ايه فينا نغيّر/ ونحنا فينا/ ونحنا بدنا. متل كل انسان شريف بدو هالبلد خالي من اي فساد / بإختصار نحنا بحاجة لدولة عناية / دولة سيادة / دولة تنمية شاملة لكل المستويات . ونحنا قادرين نبني هالدولة. 

اما لاي على لائحة القوات اللبنانية؟ 

بكل بساطة / لأنو تاريخ زحلة بيشهد على المقاومة اللبنانية / مقاومة بكل الظروف / لانو مقاومتنا بالعمل والحب / والحياة والحضارة والرقيّ والعيش الكريم ضمن دولة مش دويلة والسلاح الغير شرعي.

ليه على لائحة القوات ؟ لأنو التجربة برهنت انو نواب وزرا القوات ما علين ولا شبهة فساد وبشهادة الخصوم قبل الحلفا لأنو غيرنا كل ما زاد ولاؤه لغير لبنان كل ما زاد عناد القوات وعنفوانن كرمال سيادة لبنان.

شباب وصبايا / نساء ورجال/ اهل البقاع وزحلة / اهالي حارتي / أنا ما جيت من سُلالة اقطاعية / ولا من تُوريث سياسي / بشوف حالي / اني من عيلة / تعبت / كافحت / وخسرت وانحرمت متلا متل كتار من اللبنانية .

قوموا !!!!!!!

نحط ايدنا بإيدين بعض / ونجرّب / لانّا ناس مؤمنين بربنا / ببلدنا / وبسلاح الحق الي منملكو .

يلا !!!!!! 

شمّروا عن زنودكن لانو اليوم صار بدا/ واهل زحلة والبقاع / / كل عمرن قدّاااا .