مساكن سيادة … 

مساكن زحلة السيادة والعنفوان..

مساكن زحلة الشعر والثقافة والأدب والإبداع..

مساكن حرية واستقلال..

 

مسا الخير لكل سيّدة زحلاوية وبقاعية ولبنانية خايفة على مستقبل أولادها وعم تحلم بوطن تخلّيهن فيه..

 

مسا الخير لكل بيّ زحلاوي وبقاعي ولبناني عتلان هم يكبر وما يلاقي أولاده حدّو..

 

مسا الخير لكل صبيّة وشاب عم يدرسوا بالجامعة أو ما قدروا يفوتوا على الجامعات وعم يفكّروا بمستقبلهم ببلد صارت الحقيقة فيه خطيئة،

 والكذب سياسة،

 والاحتيال شطارة،

 والكفاءة واسطة..

 

مسا الأمل لكل حدا يأس ومفكّر إنّو انقطع الأمل وعم يدوّر بهالكون عن فرصة لحياة كريمة..

 

 

 

بلدنا مشلول ونحنا فينا نرجع نمشّيه..

 

بلدنا مسروق وقرارنا السياسي مخطوف ونحنا بس لي فينا نردّن..

 

منطقتنا متل كل لبنان منّا بخير وانقطع فيها الأمل، بس نحنا فينا نردّو..

 

 

 

 

 

 

 

 

اليوم الوجع كبير،، الفقر كتير،، مصريّاتنا محجوزة،، أفقنا مسدود،، عيلنا عم تتشتّت، كل واحد ببلد، بس قدّام كل هيدا اليأس لازم نقاوم، وبقوة، لنحافظ على بلدنا ومنطقتنا وعِيَلْنا، لازم نقاوم لي جوّعونا وفقّرونا وشرّدونا ونحاسبن بصندوق الاقتراع ونقلّن ما بدنا مصاري بموسم الانتخابات، بدنا البحبوحة بحياتنا كلّا

 ونرجّع لبنان الرسالة، 

لبنان مستشفى الشرق، 

لبنان مدرسة وجامعة الشرق، 

بدنا نرجّع لبنان سويسرا الشرق

 

 

 

 

 

 

كرمال هيك لازم نتمرّد ونتحدّى..

 

أنا تمرّدت،،

 وتحدّيت،،

 واليوم، أنا أوّل امرأة بتترشّح عن المقعد الشيعي بالبقاع الأوسط، لكون صوت كل أم وأخت وزوجة بدّا عيلتا تضل مجموعة، لأن ما بدنا نصدّر اولادنا، وبدنا نوقّف نزيف الهجرة البقاعية بخلق فرص جدّيّة بالمنطقة لنثبّت وجودنا بأرضنا، وبعرف إنّو كل صبية وشاب وكل إم وبيّ من كل الطوائف رح يساعدوني اربح التحدي…

 

أنا تمرّدت وتحدّيت،

 حتّى إثبت شيعيتي اللبنانية لي بتؤمن بالوطنية مش بالطائفية، لرجّع صورة طائفة كانت رائدة بالانفتاح على الآخر، وبعرف إنّو أهالي بالبقاع رح يساعدوني اربح التحدي…

بوجوهكن هلق، عم شوف وجوه رفقاتي لي ربينا سوا، أنا وهني بال Apôtres وانتقلنا بعدها عالأنطونية مطرح ما ولادي هلق كمان عم يتعلموا

وبهالوقفة عم يقطع ببالي شريط صور أصحابي دانيال جويل منال ربيع محمد كريستيان خالد ندين إيلي ميلاد وغيرهن كتار، كاتوليك روم موارنة سريان سنة شيعة دروزما كان هم لأن كانت زحلة تضمنا كلنا !

قد ما يرفعوا شعارات طائفية رح يبقى البقاع فاتح إيدي للكل!

ما تردّونا بقى على هالخلل الرهيب بالميزان الوطني 

كفى طعناً بكيان الدولة ومؤسساتها

كفى انهيار لهيبة الدولة واقتصادها

كفى تهميش لمعانات شعبنا

كفى تشويه بمعالم لبنان الرسالة!!

نحن اليوم على مفترق طرق خطير ولازم ناخد القرار الصحيح،

 

للقاعدين ببيوتهن ومفكرين صوتن ما بيقدم ويأخر، بدي قلكن إنتو تحديدا لي بتعملوا الفرق.، مش عم قلّكن بس انتخبوني، انتخبوا وعبروا عن رأيكن،،

 

للنساء لي مفكرين إنو الإنتخابات للرجال وهني صوتن لا بيقدم ولا بيأخر ومفكرين وجودن تابع، بدي قلهن ما تستقلّوا بحالكن إنتو التمرّد على الفساد، وإنتو الأمان للأجيال الجايي صوتكن كتير مهم فكروا بخياراتكن ، مش عم قلكن بس انتخبوني، انتخبوا وعبروا عن رأيكن،،

 

 

 

 

 

 

 

 

 

للصبايا والشباب يلي بهالدورة الإنتخابية رح يكون عندهن أوّل فرصة ليساهموا بالتغير ، 

انتو النبض الشبابي الجديد ،

 إنتو ثروة لبنان وثورته ،

 قاطعوا الورقة البيضاء ،

 انتخبوا التغيير،

انتخبوا الكفاءة ،

انتخبوا الشفافية،

انتخبوا الوطنية

 

وبالأخير اسمحولي أطلب منكن:

مش بس تآمنوا بقدرتي على التغيير، آمنوا بقدرتكن إنتو

 

هيدا قراركم وهيدا هو التحدي 

صوتكن بيرجع لبنان 

 

عشتم،عاشت زحلة.. السيادة.. والحرية والاستقلال

عاش لبنان