كلنا ما منقشع من المسرح بالأخير، إلا هالديكورات الملونة، والألوان اللي عم تشع منه، ليبين كل شي حولينا مضوي، حتى الممثلين نفسهم. بس شي مرة سألتوا كيف بتتجسد هالأضواء والألوان على مسرح، محلي، بهامش مالي محدود، مع تجربة عم تزهّر عن جديد، وسلاحها الوحيد العزيمة عند الأشخاص المسؤولين عن العمل، وإصرارن على إنه يعطوا الجمهور أكثر مما عندن...
مبارح المسا بعد الساعة ثمانية بشوي، ما كان فينا إلا ما نتفاجأ بلاعبين مسرحية "ضيفة شرف" والمشرفين عليها، هنا وعم يتعاونوا على تركيب المسرح اللي رح يجمعن اليوم قدام جمهور زحلة. اللي ما عنده خبرة جورج كفوري وشانتال راباي وكل فريق العمل بالتعب والجهد اللي بينحط لحتى الجمهور يستمتع بالعرض، من دون أي ثغرة، كان ممكن يفتكر إنه المسرح ما رح يكون جاهز، للعرض الأول بهالمسا. بس بعد الساعة ثلاثة بالفجر، بعتت شانتال للمشرفين على صفحة "ضيفة شرف"، صورة للمسرح بطلته ما قبل الأخيرة على الجمهور، مع فريق المسرحية اللي لبس ثيابه، ليختبر أول إطلالة إله بالصورة الكاملة...
ما فينا إلا ما نرفع قبعاتنا قدام هيك جهد وإصرار لشبابنا بزحلة، وحتى للصغار اللي سهروا كل الليل مع أهالين، كأنن عايلة واحدة عم تنتظر مولودها الجديد.
والمولودة اليوم المسا إسمها "ضيفة شرف"... هيدا جهد بيستاهل الواحد يشجعه بمدينتنا زحلة.. كونوا كتار، حتى يبقى المسرح جزء من ثقافتنا وشكرا...